Mirsa Kerqeli me album dhe videoklip te ri

Këngëtarja nga Gjilani, Mirsa Kerçeli, ne “Kino Studio”, në kryeqytet,ka bërë promovimin e albumit edhe videoklipit të ri. Meqenëse ky është albumi i dytë, këngëtarja ka vendosur që atë ta titullojë pikërisht “I dyti”. 12 këngë, kryesisht të stilit R’n’B janë përfshirë në këtë CD-e, prej të cilave 10 këngë të reja dhe dy këngët, “Good Lucky” dhe “Në banesën time”, të cilat për audiencën janë të njohura. Krahas këngëve ritmike, në album është e përfshirë edhe një baladë. Mirsa ka thënë t’i ketë qëndruar besnike stilit të saj, duke mos specifikuar që të ketë ndonjë ndryshim që do të mund të ishte surprizë për adhuruesit e saj. Pjesa më e madhe e këngëve janë krijime të reperit, Genc Prelvukaj, përderisa për disa këngë Mirsa ka bashkëpunuar edhe me Artan Kastratin. Përveç këngëve solo, në album janë të përfshira dy duete. Ai me Genc Prelvukajn dhe dueti tjetër me këngëtarin Hekuran Krasniqin. Nga 12 këngët e albumit, këngëtarja ka vendosur që ta vizuelizojë këngën “Buzë mbi buzë”, të cilën e ka punuar Genci, e që gjithashtu interpreton një pjesë në këtë këngë. Videoklipi i këngës është realizuara në Gjilan, xhirimet e të cilit, Mirsa, ka thënë të kenë zgjatur dy ditë. Gjatë këtij sezoni këngëtarja ka thënë se do të jetë e pranishme në mbrëmje të ndryshme muzikore, si në Kosovë ashtu edhe vende të tjera. Jo më larg se javën e ardhshme, Kerçeli do të udhëtojë për në Ulqin, ku do të mbajë disa mbrëmje muzikore për të vazhduar më pas në vende tjera. Gjatë shtatorit, Mirsa, do të realizojë edhe një videoklip të ri të njërës nga këngët e albumit “I dyti”. Këngëtarja Mirsa Kerçeli, e cila ka debutuar në spektaklin “Ethet e së premtes mbrëma”, njihet për hite të tilla si: “Djaloshi im”, “Indiferent”, “Punë e madhe” etj.