Albumi i aktores Scarlett Johansson në shitje më 20 maj

Albumi debutues i aktores Scarlett Johansson “Anywhere I Lay My Head” siç duket reflekton stilin e saj të jetesës. "Albumi im i përshtatet mënyrës sime të jetesës", ka thënë aktorja për numrin e muajit maj të revistës “Spin”. Ajo gjithashtu ka tërhequr një paralele në mes vetes dhe të famshmeve të tjera, që njëherësh kanë kënduar e aktruar. "Nuk kam lidhje as me Lindsay Lohan as me Paris Hilton, qoftë për nga mënyra se si jetoj apo muzika që dëgjoj", është shprehur Johansson. "Ato mbase bëjnë muzikë që përputhet me jetën e tyre - 'A nuk do të ishte mirë që të kërcenin me këngën time në një klub nate?'", ka shtuar ajo. Albumi i Scarlett-it është incizuar gjatë 2007-ës, ndërsa do të lansohet më 20 maj të këtij viti. Incizimi i saj i ri tashmë ka tejkaluar suksesin e Jessica Simpson-in, e cila ka çmuar lartë talentin e koleges. "E respektoj shumë atë, mendoj se është një person shumë i talentuar ndonëse e re në moshë", ka thënë Jessica për revistën “Esquire”. "Dhe është jashtëzakonisht e bukur. Plus, punon me më të mirët prej më të mirëve", ka përfunduar ajo. Albumi i artistes përfshin një këngë origjina dhe 10 përpunime të këngëve të Tom Waits-it.