Librari online me gjysmë milionë tituj

Librari online me gjysmë milionë tituj
Gjiganti i internetit fillon projektin e ri, një shërbim i cili të gjithë përdoruesve do t’u mundësojë blerjen e librave në format elektronik dhe leximin e tyre me anë të çfarëdo pajisje e cila ka qasje në internet, përfshirë celularët, laptopët dhe lexuesit elektronik të librave (eReaders).
Google Editions do të paraqitet në fillim të vitit 2010, derisa ky shërbim do të ofrojë 500.000 tituj të botuesve të ndryshme. Editions do të jetë konkurrent direkt i Amazon.com dhe eReaderit të tij Kindle.

Shfrytëzuesit do të mund të blejnë drejtpërdrejt nga Google dhe partnerët e kësaj kompanie nëpërmes platformës Google Editions.

Secili libër të cilin do ta blini do të ruhet në pajisjen tuaj dhe do të mund ta lexoni edhe pa lidhje në internet.

Shumë botues tanimë janë ankuar për shkak të paralajmërimit të këtij projekti të ri, e sipas informatave të para Google do t’u paguajë 63 për qind për secilin libër që shitet me anë të kësaj platforme. Për vete Google do të mbaj 37 për qind, shkruan gazeta britanike “Daily Mail”.

Librat elektronike kanë arritur popullaritet të madh me paraqitjen e lexuesit Kindle të Amazon dhe atij Reader nga Sony. Me anë të internetit shiten prej 1 deri në 5 për qind të librave, por pritet që kjo përqindje të rritet së shpejti. /Telegrafi/