Mbretërit e nisin mbarë vitin e ri

Skuadra e Real Madridit e ka fituar derbin kryesor të javës së shtatëmbëdhjetë në La Liga duke e mposhtur Villarrealin në Santiago Bernabeu me rezultat minimal prej 1-0.

Në njëmbëdhjetëshin bazë të Mbretërve u inkuadruan dy transferët e rinj, Lassana Diarra dhe Klaas Jan Huntelaar, ndërkohë që mungoi Guti. Kurse për Nëndetësen e Verdhë ishte kthyer Nihat Kaveci.

Los Merengues zhvilluan nja gjysmëlojë të parë shumë më të mirë se kundërshtari i tyre me ç’rast arritën ta shënonin edhe golin e epërsisë, i cili në fund rezultoi të ishte goli i fitores.
Fitoren lojtarëve me fanella të bardhë ua siguroi Arjen Robben, i cili në minutën e 31-të shënoi një supergol, padyshim njërin nga golat më të mirë të sezonit.

Lojtarët e Villarreal e kërkuan më shumë fitoren në pjesën e dytë duke krijuar më shumë presion përpara portës së Iker Casillas, mirëpo deri në fund të takimit nuk arritën të ndryshonin asgjë.

Kjo fitore e ngjet Real Madridin në pozitën e tretë me 32 pikë, një më shumë se Sevilla, e cila sonte zhvillon ndeshjen kundër Osasunas.