Valencia mposht Getafen

Valencia mposht Getafen
Skuadra e Valencias ka mbajtur hapin drejt kreut të tabelës pasi në ndeshjen e fundit të javës së dhjetë në La Liga, e ka mposhtur Getafen me rezultat 3-0.
Ndeshja u zhvillua në shtëpinë e Getafes në Coliseum Alfonso Perez, ndërsa tifozët vendas i heshti fillimisht Manuel Fernandes (29’) i cili krijoi epërsinë për Los Che.

Edhe më keq shkuan punët për vendasit pasi në fund të pjesës së parë nga ndeshja u largua Roberto Soldado, i cili u ndëshkua me karton të kuq.

Në pjesën e dytë Valencia e kishte shumë më lehtë pasi kishte edhe epërsinë e një lojtari në fushë. Kështu, një gjuajtje nga Joaquin Sanchez prej afro 18 metrash e mposhti për të dytën herë portierin Abondanzieri.

Mysafirët nuk u ndalën me kaq, ata shënuan edhe golin e tretë. Pas një kundërsulmi të shpejtë, Edu pasoi te Vicente Rodriguez i cili shënoi edhe golin e tretë për Valencian e cila me këtë fitore barazohet me pikë me Real Madridin, me nga 23 pikë, dhe ndajnë pozitën e tretë.