Televizori i cili e di kush jeni dhe ku jeni

Koncepti i kompanisë Panasonic për televizorin e së ardhmes, është bukur ambicioz, dhe tërësisht ndërron rolin e televizionit në shtëpinë tuaj.

Ai quhet Life Wall, diagonalen e ekranit e ka 150 inç, është jashtëzakonisht i hollë, derisa Panasonic planifikon ta lëshojë në shitje qysh në vitin e ardhshëm. Bëhet fjalë për televizorin i cili mbulon tërë murin e dhomës dhe shfaq gjëra të ndryshme në pjesë të ndryshme të ekranit, varësisht nga nevojat e banorëve.

Për shembull, pjesa më e madhe e sipërfaqes së tij mund të funksionojë si foto-tapetë, derisa në pjesën e poshtme mund të shihni programin televiziv.

Që kjo të funksionojë tamam si duhet, përkujdeset teknologjia e njohjes së fytyrave dhe lëvizjeve. Kur të paraqiteni para ekranit, ai do të njoh se për kë bëhet fjalë dhe ku gjendeni saktësisht, si dhe do të lëshojë programet tuaja të adhuruara në pjesën e ekranit e cila gjendet pikërisht para jush.

Nuk duhet as të flasim se si do të duken video-lojërat në këtë çudi prej ekrani, derisa janë të mundshme edhe shumë gjëra tjera, mirëpo nuk jemi të sigurt se ngulitja e syve në këtë ekran gjigant për një kohë të gjatë është edhe aq ide e mirë.

Si do që të jetë, nëse Panasonic në të vërtetë shndërron këtë koncept në realitet, fjalia e shprehur shpesh 'ruaju prej atij dreq televizori” do të ketë krejt kuptim tjetër.

www.panasonic.com