Parashihet rritja shtesë e shitjes së celularëve

Deri në fund të këtij viti, në botë do të mund të shiten rreth 1.3 miliardë telefona celularë, që do të ishte 11 për qind më shumë sesa vitin e kaluar, janë prognozat më të reja të shtëpisë analitike Gartner - të bazuara në tregues të kësaj shitjeje për tremujorin e parë dhe pritjet nga tremujori i dytë i këtij viti.

Në tremujorin e parë të këtij viti, sipas të dhënave të Gartner, në botë janë shitur 294.3 milionë telefona celularë, derisa për tremujorin e dytë parashihet se shitjet do të sillen prej 300 deri në 305 milionë njësi të celularëve të shitur.

Gjithsej pritet se shitja e telefonave celularë në pjesën e parë të këtij viti në botë do të mund të arrinte mbi 600 milionë njësi, me ç’rast nga Gartner përmendin se gjysma e dytë e vitit, posaçërisht tremujori i tretë, do të mund të sjellë shitje më të mëdha sesa ajo e dytë.

Edhe pse disa prodhues të celularëve, si Motorola dhe LG, kanë paralajmëruar mundësinë e rënies së shitjes këtë vit, në Gartner besojnë se këtë vit megjithatë do të shënohet rritje, për të cilën përveç produkteve të reja do t’i shkojë në favor edhe shitja tradicionale në fund të vitit.

Sipas prognozave të Gartner më së shumti telefona celularë deri në fund të vitit do të shiten në rajon e Azisë dhe Paqësorit, rreth 470 milionë apo 18 për qind më shumë se më herët.

Pason Evropa Perëndimore, ku kjo shitje do të mund të arrinte 188 milionë njësi apo 1.5 më pak se më herët, derisa Amerika Veriore me 186 milionë telefona celularë të prognozuar për shitje do të ishte në plus për diç më shumë se 5 për qind.

Në Japoni pritet rënie e shitjes prej rreth 9 për qind në krahasim me vitin 2007 apo rreth 48 milionë telefona celularë të shitur.