Kryengritja Shqiptare Për Liri dhe Golgota Serbe-në Kosovë Po Lufton Davidi me Goliat

Kryengritja Shqiptare Për Liri dhe Golgota Serbe-në Kosovë Po Lufton Davidi me Goliatin (1)

Në udhëkryqin e tri kontinenteve

Gjekë Gjonlekaj

Poetët, siç thuhet, janë zëri paralajmërues i ngjarjeve dhe adhurimeve njerëzore e kombëtare. Ata merren gjithherë me aktualitetin dhe, pikërisht, edhe në këtë kohë kur popullin shqiptar e ka kapluar dhembja e mjerimi, lexuesi përkujton vargjet poetike të Fan S. Nolit dhe fiton përshtypjen se ato vargje i janë kushtuar Kosovës:

Ku e lam` e ku na mbeti,
Vaj-vatani e mjer-mileti.
Pranë sofrës i pangrënë,
Pranë dijes i panxënë...

Marsi e prilli, siç dihet, janë dy muajt më të bukur të stinës, por shqiptarëve shpeshhere u kanë sjellë dhimbje, tragjedi dhe mbase edhe humbjen e lirisë kombëtare. Nëpër mote gjatë këtyre dy muajve, vdiqën ose u vranë shumë personalitete të shquara të historisë dhe kulturës shqiptare.
Tragjeditë po përsëriten, ashtu si u përsërit edhe kjo sivjet në Kosovë (1981), ku Jugosllavia u vërsul me tmerrin më të madh, dhe skenat e kësaj vërsuljeje nuk janë parë që nga Lufta II Botërore. Ushtria, policia dhe organet e sigurimit jugosllav po e keqtrajtojnë popullin shqiptar, i cili po vuan për më tepër se një shekull nën robëri.
Një ditë mjerimesh është e gjatë, e jo më shekuj te tërë! Në këtë kohë të keqe kur popullin shqiptar e ka mbuluar zia dhe mjerimi, secili prej nesh është i preokupuar se si të gjendet rruga që edhe ky popull shumë i vuajtur t`i hedhë prangat e robërisë dhe natyrisht të ndryshojë gjendjen e tij shoqërore dhe politike. Rastet e tilla janë shqetësuese, kur sheh sa të pazotët jemi për t`i dalë në ndihmë popullit tonë. "Nga një shqiptar i Amerikës kisha dëgjuar moton: "Ne jemi të mëdhenj për punë të vogla, e të vegjël për punë ta mëdha"
Megjithato vuajtje, prapëseprapë ishim krenarë dhe te lumtur dhe në këtë kontekst duhet të falënderojmë Perëndinë për vetitë e mira që na dha, e bashkë me to edhe tokën tonë të cilën, siç ka pasë thënë i moçmi:" Më vështirë është ta ruash sesa ta fitosh". Toka jonë në udhëkryqin e tri kontinenteve, dhe me bukuritë e shumta natyrore, mjerisht u bë lakmi për grabitqarët e ndryshëm, sidomos për popujt fqinj. Kohë pas kohe të huajt shkelën me këmbë të hekurt mbi tokën tonë, aq sa një shumicë e popullit për të shpëtuar jetën iu qep maleve te ashpra shqiptare plot bore