Shqiptarë për interes

Një lloj biznesi që ka lulëzuar dhjetë vitet e fundit është edhe të kënduarit, ku për arsye përfitimi dhjetëra njerëz kanë zgjedhur këtë rrugë, edhe pse mund të mos kenë prirje për këndim.

Për të depërtuar në treg, ata kanë gjetur mënyra të ndryshme. Disa këngëtarë edhe pse në fillimet e karrierës së tyre s’kanë ditur asnjë fjalë shqip, për të përfituar më tepër publik, famë dhe para, janë bërë “këngëtarë shqiptarë”.

Fjalët e para në shqip që mësoi Bertan Asllani, kanë qenë tekstet e këngëve në gjuhën shqipe, ku ai gjeti terren për të vepruar.

Adrian Gaxha në fillimet e këndimit nuk lidhte dot dy fjalë në gjuhën shqipe. Duke kënduar herë shqip e herë maqedonisht dhe duke u munduar që të fitoj sa më shumë popullaritet, ai e pa se me këngën në gjuhën shqipe mund të ecte më shpejt përpara.

Big Mama që “bën emisione për kulturën shqiptare” në emisionet televizive maqedonase deklarohet “gjysmë shqiptare e gjysmë turke”, ndërsa në emisionet në gjuhën shqipe, si patriote e kulluar.

Edhe Altuna Sejdiu – Tuna, e gjetur “mes dy zjarreve”, ia mësyn nga të dyja anët, por përsëri më tepër depërton me këngët në gjuhën shqipe. Pas konkurrimit për në Evrovizion, një vit më parë, Tuna i akuzoi organizatorët se në momentin e konkurrimit ia kanë prishur zërimin dhe në vesh nuk i ka mbërritur muzika.

Edhe pse muzika i ka të përbashkëta notat, muzikantët mendojnë se në kohën e sotme, mbizotëron vetëm përfitimi e asgjë më tepër.

“E gjithë kjo është komercializëm, në pyetje është vetëm biznesi e asgjë më shumë. Këndohet në play back e jo live”, thotë violisti Blerim Grubi.

Grubi sqaron se me anë të emisioneve televizive që mbahen në Shqipëri, ku dhe këndohet ‘live’, gjërat kanë nisur të ndryshojnë, ndërsa në Maqedoni bastardimi po vazhdon dhe më tej.

“Nuk kemi kritikë të mirëfilltë dhe lejohet që çdo gjë të transmetohet në televizion”, tha Grubi, duke shtuar se tregu shqiptar është shumë më i madh se ai maqedonas, ndaj dhe hapësira e këtyre këngëtarëve është më e madhe. /lajm/