Italia siguron çerekfinalen

Kampioni i Botës, Italia, ka arritur të mposhtë Francën me rezultat 2-0, duke siguruar kështu pjesëmarrjen në tetëshen më të mirë të kampionatit evropian, kjo falë edhe fitores së Holandës ndaj Rumanisë me po të njëjtin rezultat.
Franca pësoi një goditje që në fillim të ndeshjes, së pari me lëndimin e Franck Ribery pas vetëm 10 minutash lojë, dhe pastaj edhe pas penaltisë së shkaktuar ndaj Luca Tonit nga Eric Abidal, i cili edhe u përjashtua nga loja me karton të kuq (24’). Nga pika e bardhë nuk huq Andrea Pirlo, që solli avantazhin për italianët.

Me 10 lojtarë, francezët dështuan të rrezikojnë portën e portierit Gianluigi Buffon, ndryshe nga italianët që u treguan vazhdimisht sulmues, me plotë raste shënimi.

Edhe pjesa e dytë ishte në favor të azurëve, të cilët krahas rasteve të shumta, arritën tek goli i dytë falë një gjuajtje të lirë të shutuar nga Daniele De Rosi (62’), që ishte edhe goli vendimtar i fitores së merituar të Italisë.

Holanda dominon me 9 pikë
Në ndeshjen tjetër të grupit C, Holanda, megjithëse me mungesa të dukshme nga formacioni i parë, arriti të mposhtë Rumaninë me rezultat 2-0.

Golin e parë të ndeshjes e shënoi sulmuesi i Ajaxit, Klaas Jan Huntelaar, në minutën e 54-të të ndeshjes, derisa rezultatin e dyfishoi sulmuesi i Arsenalit, Robin Van Persie, tre minuta para fundit të kohës së rregullt të ndeshjes (84’).

Me këtë fitore, Holanda kryeson grupin me të gjitha pikët e fituara, 9, dhe do të takohet në çerekfinale me ekipin që do të renditet i dyti nga grupi D, dhe që sipas gjasave do të jetë Suedia ose Rusia.

Italia, e cila pas kësaj fitoreje renditet e dyta në grupin C, me 4 pikë, do të takohet në çerekfinale me liderin e grupit D, Spanjën, që tashmë ka siguruar çerekfinalen si dhe vendin e parë.