Të paqarta ankesat ndaj nesh

REAGIM I KK "CHAMPION" NDAJ DEKLARATAVE TË DREJTUESVE TË KK "ULQINI", TË BOTUARA NË NUMRIN E KALUAR TË GAZETËS "KOHA JAVORE

Të paqarta ankesat ndaj nesh

Ne udhëheqësia e Klubit të Karatesë "Champion" nuk i kemi të qarta vërejtjet ose më qartë ankesat e KK "Ulqini" drejtuar klubit tonë. Ne gjatë gjithë kohës kemi qenë dhe jemi të gatshëm për bashkëpunim mes klubeve dhe dëshmia më e mirë që këtë e arritëm është Turneu ynë i Parë Internacional "Champion Cup 2008", i cili u mbajt në Ulqin më 31 maj të këtij viti, që fitoi vetëm kritika pozitive. Si në jetë, ashtu dhe në sport, vlen thënia e shkruar: ai që humb, ka të drejtë të zemërohet. Por udhëheqësia e Klubit "Champion" e shikon të pakumtimtë veprimin e kolegëve të KK "Ulqini" që përmes mediave u munduan t`i acarojnë përshtypjet e qytetarëve në lidhje me organizimin e turneut dhe me këtë të hedhin poshtë vlerat tona si klub.
Është çështje e organizimit të brendshëm dhe marrëveshjes në klub se në cilën garë merret pjesë, me sa garues dhe a është motivi i pjesëmarrjes kënaqësia për të marrë pjesë, shoqëria apo shpërblimi me të holla, apo arsye të tjera të çfarëdolloji. Dëshmojmë se disa ditë para mbajtjes së Turneut tonë, njëri nga personat e udhëheqësisë së KK "Ulqini" tha: "ne do të marrim pjesë në turneun tuaj masovikisht dhe do të marrim vendin e parë në renditjen e përgjithshme".
Ne shprehim keqardhje për Klubin "Ulqini", që u rendit në vendin e tretë dhe si sportistë të vërtetë u jemi mirënjohës që na nderuan me pjesëmarrjen e tyre, pa marrë parasysh se cili ishte motivi i kësaj pjesëmarrjeje. Theksojmë se për KK "Champion" edhe në të ardhmen do të jetë kënaqësi të organizojë gara të tilla prestigjoze dhe në mënyrë dinjitoze t`i mirëpresë të gjithë garuesit, si nga qyteti ynë, ashtu edhe nga vendi dhe jashtë.
Shtojmë se reagimin e bërë nga ana e KK "Ulqini" nuk e shohim si pengesë për vazhdimin e punës së mëtejshme, ku qellimi ynë është që të rinjtë tanë të bëhen shembull i sjelljes së mirë, kulturës dhe disiplinës dhe që urrejtja dhe xhelozia të mos zëjë vend kurrë në karrierën e tyre sportive dhe atë private. Duke qenë të tillë, do të vazhdojmë të ruajmë besimin dhe përkrahjen e prindërve të garuesve tanë dhe gjithë qytetarëve.
Për një gjë pajtohemi me kolegët e KK "Ulqini". Të gjithë së bashku duhet të punojmë për afirmimin e këtij sporti në qytetin tonë, por gjithashtu të luajmë me rregulla të sinqerta, pikërisht për arsye të karateistëve tanë të rinj, sepse ata janë pasuria dhe krenaria e klubeve tona, të cilët nga ne mësojnë për jetën dhe për sportin.

Udhëheqësia e KK "Champion"