Më i miri në Preshevë

KLUBI I KARATESË "ULQINI

Më i miri në Preshevë

Të dielën, më 22 qershor 2008 në Preshevë u mbajt Turneu i ndërkombëtar i karatesë "Presheva Open 2008" në organizimin e klubit vendas "Presheva Lions", në të cilin, përveç klubeve vendase dhe KK "Ulqini", morën pjesë edhe shumë klube të njohura të karatesë nga Kosova, Maqedonia dhe Serbia.
Klubi i karatesë "Ulqini" dominoi dukshëm në këtë garë, garuesit e të cilit fituan gjithsej 10 kupa dhe 42 medalje: 16 të arta, 15 të argjendta dhe 11 të bronzta në disiplinat individuale dhe ekipore, duke qenë kështu më të mirët e turneut.
Nga ky klub, përveç medaljeve të tjera, me tri medalje të arta u kurorëzua Liridon Elezi, me nga dy të arta Jehona Musliq, Antigona Rama, Dardan Ceka, Viktor Curoviq dhe Muhamet Kraja dhe me nga një të artë Doriana Taipi, Albion Duraku dhe Bujar Kovaçi.
Me medalje të tjera u kurorëzuan Granit Rexha, Petar Barlloviq, Diamant Rexha dhe Agron Seferi.
Kjo ishte hera e parë që karateistët nga Ulqini ishin mysafirë të kolegëve të tyre preshevarë duke vazhduar në këtë mënyrë bashkëpunimin miqësor e sportiv të inicuar kohë më parë në Ulqin. Paraqitja e KK "Ulqinit" në Preshevë njëkohësisht ishte edhe reklamë e denjë për qytetin tonë turistik.
- Me këtë garë Klubi i Karatesë "Ulqini" përfundon sezonin e parë të garave për këtë vit, i cili ishte shumë i suksesshëm. Përsëri arritëm që të mbetemi ndër klubet më të mira si në vend ashtu dhe jashtë vendit, - të kënaqur shprehen udhëheqësit e Klubit të Karatesë "Ulqini" dhe vazhdojnë:
- Falënderim të veçantë meritojnë të gjithë sponzorët tanë, të cilët na përkrahën për këtë garë, si dhe prindërit e fëmijëve. Të cekim se së shpejti ne do të organizojmë seminarin e karatesë "Vera 2008", seminar ky, të cilin klubi ynë tradicionalisht e organizon tash disa vite me radhë. Sivjet për pjesëmarrje në seminarin tonë janë të interesuar edhe disa klube të karatesë nga jashtë.

Kohapress