Premtohet më tepër ndihmë në të ardhmen

KOMUNA E ULQINIT NDAU PARATË PËR KLUBET SPORTIVE TË KËSAJ KOMUNE PËR VITIN 2008

Premtohet më tepër ndihmë në të ardhmen

Ulqin - Komuna e Ulqinit ka ndarë për herë të parë sivjet 80 mijë euro për sportin e këtij qyteti. Përfitues për këtë vit janë shtatë klube të cilave u janë ndarë 55 mijë euro, ndërsa 25 mijë euro të tjera në bazë të vendimit të Komisionit për Ndarjen e Mjeteve Financiare për klubet sportive janë lënë në fondin rezervë.
Shuma më e madhe për këtë vit, 18 mijë euro, i është dhënë KF "Otrant, kurse KFV "Teuta" i kanë takuar 7 mijë euro.
Ndër klubet basketbollistike, KB "Ulqini" ka përfituar 11 mijë euro, ndërsa KB "Jadran" 4 mijë euro.
Nga buxheti i Komunës së Ulqinit kanë përfituar edhe tre klubet e karatesë së këtij qyteti. KK "Ulqini" dhe KK "Albulena" kanë përfituar nga 5500 euro, ndërsa KK "Champion" 4000 euro.
Në konferencën për shtyp të organizuar të premten, kryetari i Komunës së Ulqinit, Gëzim Hajdinaga theksoi se shuma e ndarë është e vogël duke pasur parasysh numrin e klubeve sportive në Ulqin.
"Dua t`ju siguroj se gjatë mandatit tim do të luftoj dhe do të përpiqem nga viti në vit që të rritet fondi i Komunës për sportin", theksoi ai.
Hajdinaga u premtoi edhe ndërtimin e sallës së sportit në Ulqin.
"Ne jemi duke bërë matjet, caktimin se ku do të jetë lokaliteti. Jemi duke parë se cila është mënyra më e shpejtë për të ardhur deri te një projekt i shumëpritur që ju të mos ballafaqoheni me probleme", tha ai.
Përfaqësuesit e klubeve sportive falënderuan Komunën e Ulqinit për ndarjen e mjeteve, që siç thanë ata, do t`u ndihmojnë për të arritur rezultate edhe më të mira në të ardhmen.
Nga përfaqësuesit e klubeve u dëgjuan disa propozime, si krijimi i bashkësisë së klubeve sportive të Ulqinit si dhe angazhimi i një personi pranë Komunës për sport.



i.k
kohapress
__________________
---------------------------------------------------
Jam Krenare Qe Jam Shqiptare(Malsore).Grudjane"

Rreth flamurit të përbashkuar,
Me një dëshirë dhe një qëllim,
Të gjithë atij duke iu betuar,
Të lidhim besën për shpëtim