Euro 2008, Franca nis përgatitjet pa Zidanin

Një nga ekipet pretendente për të fituar kampionatin europian, Franca, ka nisur përgatitjet për këtë kompeticion. Për herë të parë pas 12 vitesh, francezëve do t’u duhet të jenë pa idhullin e tyre Zinedin Zidan, por ylli i ri i ekipit tashmë është Frenk Riberi’.





FRANCE- Kombëtarja franceze ka nisur në Kleirfontane përgatitjet për Europianin që do nisë pas dy javësh në Zvicër e Austri. Për herë të parë në 12 vitet e fundit, “Gjelat” do të jenë pa Zinedine Zidane, i cili i dha lamtumirën futbollit pas Botërorit 2006. Skuadrës së Domenek i duhet të përballet në një grup ferri me skuadra si Italia, Holanda dhe Rumania, por trajneri francez ka gjetur një yll të ri në skuadër, mesfushorin e Bajernit të Mynihut Frenk Riberi. “Shpresoj që të jetë turneu im dhe i skuadrës time, pasi Europianin duan ta fitojnë të gjithë. Është një kompeticion shumë i vështirë, por mendoj se është shumë e rëndësishme për ne që të stërvitemi mirë dhe të zhvillojmë shumë ndeshje miqësore deri në ndeshjen e parë kundër Rumanisë”, deklaroi mesfushori francez i Bajernit. Riberi tha gjithashtu se aventura në Gjermani e ka bërë më të pjekur si futbollist. Ndërkohë, sulmuesi Tieri Henri deklaroi se pas Europianit do të tërhiqet nga ekipi kombëtar. Lojtari i Barcelonës është edhe golshënuesi më i mirë i Francës, me 44 gola në 98 ndeshje. “Është kompeticioni im i fundit me kombëtaren. Njerëzit mund ta intrepretojnë si të duan”, deklaroi Henri. Trajneri i Francës Domenek ka shpallur një listë me 30 futbollistë për kampionatin europian, por pas një jave, 7 prej tyre duhet të rikthehen në shtëpi për të mbetur vetëm 23. Franca e ka fituar dy herë kampionatin europian dhe gjithnjë është mes skuadrave favorite.