Shakira bën thirrje për edukimin e fëmijëve të varfër

Këngëtarja kolumbiane Shakira i është bashkuar kongresistes Nita Lowey dhe më shumë se 50 studentëve për të bërë thirrje që të përpilohej një ligj që do të siguronte edukimin e fëmijëve të vendeve të varfra. Pjesëmarrja e fitueses së çmimit “Grammy” në këtë ngjarje ishte pjesë e fushatës globale “Java e Edukimit” në Uashington DC që nisi të hënën dhe do të përmbyllet më 27 prill. Më shumë se 72 milionë fëmijë nga e mbarë bota nuk mbarojnë as shkollën fillore, ndërsa 226 milionë atë të mesme, një tragjedi që artistja dhe aktivistja thotë se do të ndikojë në të ardhmen e fëmijëve. Shakira është një ndër artistet dhe aktivistet më të njohura të Amerikës Latine, e cila ka krijuar një fondacion në Kolumbi që përkrah programet universale për edukim. Këngëtarja gjithashtu është ambasadore e vullnetit të mirë në UNICEF.