Besa Kokëdhima, fituesja e “Top Fest 5

Besa Kokëdhima me këngën “Engjëjt vrasin njësoj” është fituesja e edicionit të pestë të festivalit “Top Fest”. Nata finale e këtij festivali zuri vend mbrëmë në “Pallatin e Koncerteve” në kryeqytetin shqiptar, Tiranë. Besa ka fituar çmimin e madh prej 10 mijë euro, që sivjet është ndarë në kombinim me votat e teleshikuesve dhe jurisë profesionale të festivalit. Ajo gjithashtu ka fituar “Çmimin e internetit”. Edhe sivjet këngëtarët kosovarë nuk janë kthyer duarthatë. Teuta Kurti ka fituar çmimin “Interpretuesja më e mirë”, këngëtari i ri Shpat Deda u shpërblye si “Artisti më i mirë i ri”, bashkëpunimi në mes “Skillz” dhe “Viagra” është shpërblyer me çmimin “Best Hip-Hop”. Grupi Ngroba ka fituar çmimin që ndan kompania Vodafon. Ndërsa, këngëtarja Vesa Luma mori çmimin që ndan “Digitalb”. Këngëtarët e shpërblyer nëpër kategori të ndryshme krahas trofeve kanë marrë edhe nga 1 mijë euro. Natës finale për herë të parë sivjet i ka paraprirë parakalimi i artistëve mbi qilimin e kuq. Mbrëmë interpretuan 33 artistë nga gjithsej 49 sa ishin të nominuar në 10 kategori. “Top Fest” konsiderohet festivali më i madh në trojet shqipfolëse. Për këtë viti në “Top Fest” kanë konkurruar gjithsej 259 artistë.