ZANA & MATILDA drejt suksesit në “MISS UNIVERSE 2008

Dy bukuroshet shqiptare Zana Krasniqi nga Kosova dhe Matilda Meçini nga Shqipëria të cilat që nga 22 qershori kanë udhëtuar në Vietnam për të bërë përgatitjet rreth përfaqësimit të dy shteteve shqiptare pjesëmarrëse në garën e bukurisë “Miss Universe 2008”, janë duke u vlerësuar lartë nga kritika atje. Në garën për kostumin më të mirë tradicional në mesin e 81 vendeve pjesëmarrëse sipas agjencisë shqiptare FBA, kostumet e Zanës dhe Matildës janë radhitur në mesin e 10 kostumeve më të mira të garës. Zana është paraqitur me “Dallame”, një nga veshjet tradicionale të Kosovës ndërsa Matilda është paraqitur me një kostum i cili bartë ngjyrat e flamurit kombëtar shqiptar dhe është ridisejnim i kostumit të heroit kombëtar shqiptar Gjergj Kastrioti Skënderbeu. Sipas kritikës në Vietnam duket se vajzat shqiptare do të klasifikohen lartë në garën finale të “Miss Universe 2008” e cila sivjet do të udhëhiqet nga dy emra të njohur të show-bizit botëror si prezantuesi i famshëm televiziv, amerikani Jerry Sprigner dhe aktorja e këngëtarja Mel B, e njohur edhe njëra nga pesë vajzat e grupit britanik “Spice Girls”. Zana Krasniqi përfaqëson Republikën e Kosovës në këtë manifestimin të përvitshëm të bukurisë. Dyshimet nëse Zana mund të udhëtojë drejt Vietnamin pasi që autoritetet e këtij vendi i patën bërë probleme bukuroshes rreth marrjes së vizës janë hedhur poshtë. Nëpër media ky vendim u pat komentuar si diçka e pritur meqë Vietnami ende nuk e ka njohur pavarësinë e Kosovës. “Miss Universe” është ideuar dhe organizohet nga biznesmeni i njohur botëror, Donald Trump. Më parë në këtë eveniment pjesëmarrëse ishte edhe ‘Miss Kosova 2003’ dhe ‘Miss Albania 2004’ Agnesa Vuthaj.