Sulm i rëndë ndaj kompjuterëve të Departamentit të Mbrojtjes

Sulm i rëndë ndaj kompjuterëve të Departamentit të Mbrojtjes
Sipas një njoftimi të gazetës Los Angeles Times, zyrtarë të lartë të Pentagonit kanë informuar këtë javë presidentin amerikan George Bush dhe sekretarin e Mbrojtjes Robert Gates, për një sulm të rëndë ndaj kompjuterëve të Departamentit të Mbrojtjes.
Sipas gazetës, sulmet janë vërejtur brenda rrjetit të kompjuterëve të Komandës Amerikane që drejton operacionet në Irak dhe Afganistan.

Sipas njoftimit që është publikuar të premten, sulmi ka prekur kompjuterët në zonat e luftimit si dhe ka arritur të depërtojë në një rrjet të fshehtë kompjuterësh të mbrojtur mirë.

Sipas gazetës Los Angeles Times, sulmi ndaj kompjuterëve mund ta ketë origjinën në Rusi, megjithëse nuk dihet nëse qeveria ruse ka pasur ndonjë rol në të.

Marrëdhëniet mes Rusisë dhe Shteteve të Bashkuara janë ftohur kohët e fundit për një sërë çështjesh, si konflikti në Gjeorgji dhe plani amerikan për instalimin në Evropën Lindore të një sistemi mbrojtjes nga raketat. /VoA/