Viruset kompjuterike sulmojnë të hënën

Viruset kompjuterike sulmojnë të hënën
Hulumtuesit ua tërheqin vëmendjen shfrytëzuesve të internetit që e hëna (24 nëntor) mund të jetë e kobshme kur bëhet fjalë për invazionin e viruseve kompjuterike.
Eksperti për teknologji i gazetës britanike Guardian thotë se analizat e informacioneve mbi viruset të cilët shpërndahen me anë të rrjetit të internetit kanë dëshmuar se në botë janë mbi 500.000 kompjuterë të infektuar, derisa ekspertët për siguri e theksojnë 24 nëntorin si datë kur mbizotëron rreziku më i madh nga shpërndarja e softuerëve të dëmshëm për këtë vit.

Hulumtimet e kryera në vitin 2007 kanë shënuar aktivitetin më të madh të viruseve në Ditën e Falënderimeve amerikane. Dita e Falënderimeve në Shtetet e Bashkuara të Amerikës shënohet çdo të katërtën të martë në nëntor, dhe këtë vit bie në 25 nëntor. Ekspertët vlerësojnë se 24 orë para kësaj do të mund të pritej sulmi më i madh i viruseve të internetit.

Kjo do të mund të ishte rezultat i rritjes së blerjeve online para Krishtlindjeve kur miliona shfrytëzues kyçen në internet me dëshirën që të gjejnë dhuratat e tyre që u përshtaten për miqtë dhe familjen. Blerësit e tillë mund të janë shënjestër e lehtë.

Këtë vit pritet rritje e numrit të blerësve online para Krishtlindjeve, derisa në Britani të Madhe vlerësojnë se do të shpenzojnë 15 për qind më shumë sesa në vitin e kaluar.

Blerësit në internet bëjnë kërkime më të shumta me shpresë se do të gjejnë artikuj më të lirë, e derisa ata kërkojnë për çmim, në nëntor e dhjetor, tanimë tradicionalisht, rritet edhe numri i softuerëve të dëmshëm.