Filmat me metrazh të gjatë së shpejti në YouTube

]
Filmat me metrazh të gjatë së shpejti në YouTube
Pas bashkëpunimit me shtëpinë televizive amerikane CBS, i cili këtij shërbimi të videove online i ka sjellë mundësinë e emetimit të serialeve të saj, YouTube do të publikojë edhe detajet e marrëveshjes së arritur me studion e madhe filmike Metro-Goldwyn-Mayer (MGM).
Si rezultat i bashkëpunimit të sapokrijuar, MGM në kanalin e veçantë të shërbimit të video online YouTube fillimisht do të vendos episodet e serisë "American Gladiators", e më pas edhe titujt tjerë të saj si "Bulletproof Monk", "The Magnificent Seven" e të tjera.

Në YouTube shumë shtëpi televizive veçmë posedojnë kanalet e tyre, mirëpo deri më tani i kanë shfrytëzuar ato vetëm për publikimin e video materialeve deri në dhjetë minuta apo edhe më të shkurtra për të promovuar titujt e tyre, e tani është hera e parë që filmat e metrazhit të gjatë do të gjenden në mënyrë të ligjshme në këtë shërbim online.

Gjatë muajit tetor YouTube, respektivisht Google si pronare e këtij shërbimi, ka arritur marrëveshje me shtëpinë multimediale CBS, me të cilën brenda faqeve të saj kanë arritur serialet të njohura edhe për ne, si "Star Trek", "Young and the Restless" e "Beverly Hills 90210".