Milito shënon hat-trick, favoritët fitojnë

Milito shënon hat-trick, favoritët fitojnë
Sulmuesi i rikthyer te Genoa, Diego Milito, ka shënuar hat-trick në fitoren e sotme të skuadrës së tij kundër Regginas me rezultat, 4-0, derisa në takimet tjera të Serie A kanë fituar skuadrat favorite.
Pjesa e parë e takimit Genoa- Reggina, përfundoi pa gola, ndërsa momenti vendimtar i ndeshjes ishte përjashtimi i Costas (45’) nga loja me kartonin e dytë të verdhë.

Milito golin e parë e shënoi nga pika e bardhë (54’) ndërsa e dyfishoi epërsinë pas njëzet minutash. Sculli (81’) e ngriti epërsinë në 3-0, ndërsa sërish Milito përmbylli takimin në minutat shtesë.

Fitore të rëndësishme me rezultat 3-0 ka shënuar edhe Lazio para tifozëve të vet kundër skuadrës së Sienas me golat e Zarates (58’), dhe me dy golat e Rochit (86’ dhe 90’).

Napoli e ka mposhtur Sampdorian në San Paolo me rezultat 2-0. Manini krijoi epërsinë për vendasit (23’) ndërsa Zalayeta dyfishoi epërsinë (74’).

Fiorentina po ashtu ka shënuar fitore në Artemio Franchi për ta ruajtur hapin me skuadrat e mëdha drejt sfidës për titullin kampion. Golat për Violan i shënuan Melo (20’) dhe Gilardino (23’).

Catania ka vazhduar ngritjen në tabelë për të qëndruar sa më lartë zonës së rrezikut, pasi ka shënuar fitore me rezultat 2-1 kundër Cagliarit.