Federer eliminohet nga Toronto Masters

Federer eliminohet nga Toronto Masters
Roger Federer e ka rrezikuar numrin një në listën e tenistëve, pasi që pësoi një goditje në rundin e dytë të Toronto Masters, ku u mposht nga francezi Gilles Simon.
Pas rikthimit në fushë për të parën herë pas humbjes ndaj Rafael Nadal në Wimbledon, Federer është mposhtur 2-6; 7-5; 6-4, dhe qëndrimi i tij në pozitën e parë është i rrezikuar nga Nadal, i cili së fundi mposhti amerikanin Jesse Levine me rezultat 6-4, 6-2.

Pas fillimit të vitit me 1,445 pikë mbi spanjollin dhe një sezoni jo aq të mirë, që përfshin 10 humbje në 53 ndeshje, Federer përballet edhe me mundësinë e humbjes së kryesimit, të cilin e ka ruajtur për 234 javë që nga vitit 2004.

Nëse Nadal ia del mirë gjatë kësaj jave, atëherë vetëm disa qindra pikë do ta ndanin atë nga Federer.

“Sezoni në fushë të fortë sapo ka filluar dhe nuk është fundi i botës, por do të dëshiroja të kisha filluar më mirë. Më pëlqen kjo sipërfaqe, më pëlqen ky turne, kam kaluar mirë në të kaluarën, andaj vërtet dhemb”, ka thënë Federer.