Adelina Thaçi interpreton në Arenën e Pulës

Sopranoja Adelina Thaçi është ngjitur ditë më parë në skenën e Arenës së Pulës, përkrah artistëve të shquar botëror në gala mbrëmjen e festivalit ndërkombëtar të muzikës “Histria”, i cili mbahet në krahinën e Istrës në Kroaci.
Një vit pas realizimit të duetit “Dolce Suono”, me tenorin e famshëm botëror Jose Carreras, Thaçi ka interpretuar këtë pjesë të kompozuar nga kosovari Bashkim Shehu, në duet me sopranon e njohur kroate Lidija Horvat Dunjko, shoqëruar nga Orkestra “European Master” e nën udhëheqjen e dirigjentes Hermine Pack.

Në këtë mbrëmje, në skenë janë prezantuar edhe emrat më të njohur të muzikës klasike në botë, duke filluar nga violinisti i shquar Stefan Milenkoviq, tenori Tomislav Muzhek dhe violonçelisti Stjepan Hauser.

Gala koncerti, të cilin sipas mediave kroate e kanë përcjellë mbi 5000 spektatorë, është përmbyllur me interpretimin e Adelina Thaçit, interpretim ky që është vlerësuar lart nga mediat kroate.

Edhe kritika kroate, po ashtu, ka lavdëruar interpretimin e saj dhe të Lidija Horvat Dunjkos, zërat e së cilave i kanë cilësuar si të mrekullueshëm. Thaçi ka arritur të tërheqë suksesshëm vëmendjen e auditorit në Pulë, pavarësisht faktit që interpretoi në të njëjtën mbrëmje me violinistin Stefan Milenkoviq, për të cilin shumë vjet më parë, kritika anë e kënd globit e cilësonte si “gjeniu i vogël”.

Në këtë koncert janë intonuar edhe veprat më të dalluara të kompozitorëve të njohur botëror si Dvorzhak, Rossini e Mendelssohn.

Adelina Thaçi gjatë këtij viti ka shënuar disa suksese në karrierën e saj. Përveç realizimit të duetit me Jose Carreras, ajo është nderuar me çmimin e parë në garat ballkanike të muzikës klasike “Bruna Spiler”, të organizuara në Herceg-Novi të Malit të Zi. Po ashtu, javë më parë ajo pati një paraqitje të suksesshme me orkestrën e Operës dhe Baletit të Maqedonisë.