Zana Krasniqi, e gjashta në “MISS UNIVERSE 2008

Bukuroshja kosovare, Zana Krasniqi, është radhitur në mesin e 10 bukurosheve më të mira në “Miss Universe 2008”, spektakël ky i cili zuri vend mbrëmë në qytetin Nha Trang të Vietnamit. Gara e 57-të për më të bukurën e universit, është dominuar nga përfaqësueset e shteteve amerikano-latine. Dayana Mendoza e Venezuelës është kurorëzuar me titullin “Miss Universe 2008”, në këtë garë bukurie, ku ideator dhe promotor kryesor i së cilës është biznesmeni i njohur amerikan Donald Trump. Përcjellësja e parë është zgjedhur “Miss Colombia”, Taliana Vargas, ndërsa e dyta, bukuroshja nga Republika Domenikane, Marianne Cruz Gonzales. Pjesëmarrja e Krasniqit dhe renditja e saj si e 6-ta në këtë garë shënon suksesin më të madh ndërkombëtar të Republikës së Kosovës, deri tash. Përfaqësimin e Kosovës në këtë garë bukurie e kanë shoqëruar edhe shumë debate, madje edhe para se Zana të udhëtonte drejt Vietnamit, kjo meqë autoritetet e këtij vendi fillimisht i patën refuzuar vizën me arsyetimin se ky vend nuk e njeh shtetin e ri të Kosovës. Megjithatë, që nga arritja e saj në Vietnam, Zana së bashku me bukuroshen nga Shqipëria, Malda Meçini, kanë tërhequr vëmendjen e kritikëve duke u cilësuar ndër favoritet për t’u radhitur lart në klasifikimet e kësaj gare bukurie. Ndër detajet që vlen të përmenden janë edhe fotot e përbashkëta që Zana i ka bërë përkrah përfaqësueses së Serbisë, Bojana Noriq. Fotoreporterët kanë shkrepur fotoaparatet e tyre, marrë parasysh marrëdhëniet jo të mira mes shteteve të këtyre dy përfaqësueseve. Në garën për kostumin më të mirë tradicional në mesin e 80 vendeve pjesëmarrëse kohë më parë, sipas agjencisë shqiptare FBA, kostumet e Zanës dhe Matildës janë radhitur në mesin e 10 kostumeve më të mira të garës. Zana është paraqitur me Tunikë, një nga veshjet e Kosovës, ndërsa Matilda është paraqitur me një kostum, i cili bart ngjyrat e flamurit kombëtar shqiptar dhe është ridisejnim i kostumit të heroit kombëtar shqiptar, Gjergj Kastrioti - Skënderbeu. “Miss Universe 2008”, ka arritur të shënojë rekord të shikueshmërisë këtë edicion, një ndër arsyet mund të jetë edhe fakti që spektakli u drejtua nga dy emra të njohur të show-bizit botëror si prezantuesi i famshëm televiziv, amerikani Jerry Sprigner dhe aktorja e këngëtarja Mel B, e njohur edhe si njëra nga pesë vajzat e grupit britanik “Spice Girls”.