Hamilton më i shpejti në stëvitje

Hamilton më i shpejti në stëvitje
Ngasësi britanik i McLarenit, ka qenë më i shpejti në stëvitjen e parë dhe të dytë të sotme të Formula 1 në German Grand Prix në Hockenheim duke shënuar kohën 1:15.537, respektivisht 1:15.025 në stëvitjen e dytë.
Stëvitja e parë

Shoku i skuadrës i Hamiltonit, Heikki Kovalainen, tejkaloi fillimin e ngadalshëm, për të përfunduar i dytë në listën e më të shpejtëve.

Dyshja e Ferrarit, Felipe Massa dhe Kimi Raikkonen, u renditën në pozitën e tretë, respektivisht të pestë, me ngasësin e Renault, Fernando Alonso, që i ndante.

Pjesa e parë e sesionit u zhvillua në kushte lagështie, pas shiut të rënë gjatë natës, por koha shpejt u përmirësua dhe në 45 minutat e fundit rruga e garës ishte e tharë.

Stëvitja e dytë

Lewis Hamilton ishte më i shpejtë edhe në serinë e dytë të stëvitjes për Çmimin e Madh të Gjermanisë që zhvillohet të dielën në Hockenheim. Xhiroja e fundit e Hamiltonit prej 1:15.025 mposhti brazilianin Felipe Massa të Ferrarit për 0.697 sekonda.

Massa u ndoq nga shoku i skuadrës dhe kampioni në fuqi, finlandezi Kimi Raikkonen, si dhe nga shoku i skuadrës së Hamiltonit, finlandezi tjetër Heikki Kovalainen, duke çuar në katër pozitat e para McLarenin dhe Ferrarin.

Postuar: 12:38 / 18 Korrik '08 | RSS